Pictiwrs.com

In America (Jim Sheridan, 2002)

(IMDb)

Ffilm yn dilyn hanes Christy, merch deng mlwydd oed sydd yn symud gyda’i rhieni a’i chwaer fach o’r Iwerddon i Efrog Newydd yw ‘In America’. Mae’r teulu yn chwilio am fywyd newydd wedi marwolaeth eu mhab Frankie, ond dyw pethau ddim yn hawdd ar y dechrau – maent yn ymgartrefu mewn bloc o fflatiau mewn ardal dlawd ac mae arian yn brin wrth i’r tad fethu yn ei ymdrechion i gael gwaith fel actor.

Wedi i’r fam ddarganfod ei bod yn feichiog, mae anallu’r teulu, a’r tad yn arbennig, i anghofio’r gorffennol yn dod i’r amlwg. Ond fe ddaw gobaith o gyfeiriad anisgwyl ar ffurf yr artist Mateo, sy’n byw ar y llawr islaw. Wrth i Mateo (Djimon Hounsou) fynd ar daith bersonol o fod yn chwerw a chas i fod yn garedig a bodlon, mae’r teulu’n ei ddilyn wrth iddyn nhw ganfod gobaith am ddyfodol gwell.

Y cyfarwyddwr Jim Sheridan ysgrifennodd y sgript gyda chymorth ei ddwy ferch ac mae’r stori’n seiliedig ar brofiad eu teulu nhw’n symud i’r Unol Daleithiau. Er gwaetha hyn, dyw’r stori ddim yn argyhoeddi fel un a fyddai’n digwydd yn y byd go iawn. Un o’r prif resymau am hyn yw’r lleoliad a’r ddelwedd ramantaidd o gymdeithas glos yn ffynnu er gwaetha’r tlodi. Yn sgil hyn, gwelwn nifer o olygfeydd na fyddai allan o le mewn ffilm Disney, ond yr un sy’n mynd a’r wobr am yr un mwyaf anghredadwy yw’r un sy’n gweld y ddwy ferch yn cael eu gyrru ar eu pennau eu hunain i’r siop hufen ia er mwyn i’r rhieni gael llonydd i ‘chwarae’.

Cymeriad Mateo sy’n clymu’r ffilm at ei gilydd ond ar yr un pryd mae’n un o’i gwendidau pennaf. Mae ei droedigaeth o fod yn ddyn mawr blin i fod yn ddyn mawr clen yn digwydd yn rhy sydyn ac yn rhy hawdd.

Ond pan fo’r stori’n cael ei hadrodd o safbwynt merch fach yna mae’n bosib maddau rhywfaint o sentimentaleiddwch. Ac yn wir mae perfformiadau naturiol y ddwy ferch ifanc (dwy chwaer go iawn, Sarah ac Emma Bolger) yn achub rhywfaint ar y ffilm. Mae yma berfformiadau cryf hefyd gan y rhieni (Paddy Considine a Samantha Morton) sy’n arwain at gydymdeimlad â’u galar a’u gobaith.

Y plant yw calon y ffilm yma ac yn y bôn mae ‘In America’ fel ffilm Disney ym ymwneud â’r thema o alaru. Wrth ei hystyried hi felly, mae hi’n gweithio er gwaetha ei gwendidau.