(IMDb
Dyma ni, felly, ail ffilm gan Woody Allen i ymddangos mewn llai na blwyddyn (Melinda and Melinda oedd y llall wrth gwrs). Y tro hwn, mae’r cast yn llawer cryfach, gyda pherfformiadau cryf gan Jonathan Rhys Meyers a Scarlett Johansson yn enwedig. Yn anffodus, wrth i Allen symud o’i gynefin yn Efrog Newydd i amgylchiadau anghyfarwydd Llundain, ymddengys ei fod wedi colli tipyn o’i ddealltwriaeth o bobl a chynefin.
Mae Chris (Meyers) yn gyn-chwaraewr tenis sydd wedi rhoi’r gorau i’w yrfa broffesiynol (lled-lwyddiannus) i fod yn hyfforddwr tenis yng nghlwb enwog Queen’s yn Llundain. Yno, daw i gwrdd â Tom (Matthew Goode), a dod yn ffrindiau â’i deulu drwy gariad y ddau at opera. Mae’n amlwg nad yw Chris o’r un anian â nhw, y teulu cefnog, diwylliedig, ond mae’n amlwg yn ceisio ‘gwella’i hun’ a dringo ysgol cymdeithas. Mae’n cwrdd â chwaer Tom, Chloe (Emily Mortimer), a datblyga carwriaeth rhyngddynt. Ond yna, mae Chris yn cwrdd â Nola (Johansson), dyweddi Tom, ac mae sbarc yn amlwg yn bodoli rhyngddynt. Mae’r ddau’n dechrau caru, ond penderfyna Nola na all pethau bara.
Digon araf yw’r ffilm i ddechrau, ac mae’n llawn ystrydebau am ffordd o fyw y dosbarth uwch mewn cymdeithas Seisnig. Fodd bynnag, nid ydym yn siwr sut i ddarllen cymeriad Chris. Mae’n amlwg fod ganddo ddigon o uchelgais, ond mae’r cliw a gawn o’r cipolwg ohono’n darllen ‘Crime and Punishment’ gan Dostoyevsky yn arwydd nad yw pob dim mor ddiniwed ag y mae’n ceisio’i gyfleu. Ceir adleisiau cryf hefyd o Macbeth, gyda’r prif gymeriad yn amau’i hun, yn clywed lleisiau sy’n procio’i euogrwydd, a’r ffaith na all ef a Chloe gael plentyn.
Yn raddol, tro’r ffilm yn ‘thriller’, ond erbyn hynny mae rhywfaint o’r diddordeb wedi’i golli. Er gwaethaf perfformiad cryf Meyers, does dim digon yn digwydd i gynnal y ffilm. Mae’r tro yng nghynffon y ffilm yn glyfar, ond prysur flino mae Allen. Er gwaethaf clyfrwch y ffilm, perfformiadau da, y teimlad yw ei fod allan o'i ddyfnder yma, heb ddealltwriaeth o'r bobl sy'n chwarae'i bypedau.
Postiwyd gan Geraint Criddle ar Ionawr 9, 2006 10:05 yh